IT MONDOW OM IT SONIT MINGUT MITAWUN-TAWUN

Insan tadau kah sid iso o govuton nokopisamung no inot Mondow om it Sonit. Na ino tu osusa banal kakakanan ong sonit na minongitung no ino Mondow om nokitung no yosido dot iso ot takal. Minomoros no yosido sid ginavo dau do ka ”Adih okorup dati Yodonit diti ong tunuvan” ka dit ginavo di Ondow. Pomoros no ka inot Mondow sidi Odonit ka dau, ”O Ambaza, na ka mitawun-tawun kito” ka dinot Mondow. Na inot Sonit tu kilo banal ka dinot kobuatano do Mondow ka minangakun no bo yosido. “Ikau pobo gulu dino Ambaza” ka di Mondow. “Oboh” ka dinot Sonit. Untunai no ka bogima di Mondow ino Sonit. Ongo sahap, kazu opodok agazo no ponguntung dinoya sonit. Na ino sonit ka, soira monguntun-nuntun do tutudan dau kah ino Mondow, minongukud no do tanah Yodonit tu milivung sumurid bavang mongoi do vaig ka. It ongo vaig nongoi-ongoi dau ka izopos dau sid ginilion dau ka. Na pongondim no ka bogima inot Mondow tu rumosi ko mangakal mogidu Yodonit ka “Sino ko ie Odonit?” ka dinot Mondow. Ambato nopo ka dinot Sonit “O.. Siti ie oku bo diti Odondow” ka dinot Sonit. “Ba mobputik oku no ma diti, intahan no” Ka dino Mondow. “Oboh bino Ondow” ka di Odonit. Na tutudai no ka di Mondow ka inot inumpug dau dot avun. Soira novuvu ka ino yat apui panavahan no ino Mondow, “Sino ko ih Odonit” ka dinot Mondow. “O.. Siti oku ie boh Ondow” ka dinot Sonit. Na inot Mondow ka banal ko ovongo kuran kinoposizan dinot Sonit imatai noka dau tu amu kasip nga banal-banal ko amu minatai ino Sonit. Pongitung noka bogima inot Mondow “Ong amu minatai Yodonit jadi yoku dati ino nga amu ie matai” ka dit itung dinot Mondow. “Na ikau po bino Ambaza” ka dinot Sonit ka. Gikol no bogima inot Mondow.

Na pogihim no ka bogima ponguntun dinot Mondow ka inot Sonit om tutudai no dau inot Mondow ka. Modung-vodung noka bogima kino tutudan dinot Mondow om ningkono po diri ka. Soira novuvu ka inot avun ka, imatai no dinot Sonit ka nga baiko tulang po inot Mondow. Onvo no ka bogima dino sonit ino tulang do Mondow ka om gamao no do Sundatang. Ponundatang po ka Yodonit ka orongou no ka dot uni dau do yadkiti “KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN” ka. Na ipat tadau no ka bogima monundatang inot sonit ka. Insan tadau, norongou dinot ongo kara ka. ”Avantang mang ino sundatang do sonit oi” ka dit ongo kara. Na norongou dinot anak do kara, ”Idi gamaai oku po kah sundatang yadko ilo do sonit” ka dinot anak do kara. ”Oboh” kada dit tidi do kara do minomudut. Soira minodop inot sonit ka takaho no ka bogima dinot tidi do kara it sundatang dinot sonit patahako ogi siriyad anak dau. Soira nanu dit anak kara ka ponundatang no yosido ”KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN”. Suvai nokotungang om nokotigog ka inot sonit mining-ining dinot tuni om imatai dau it sundatang dau aso no, natakau no do kara. Panavahan noko inot Sonit tu amu kindakod ka yosido tu mindamo dino Sundatang dau ka ”Adih Adara, ino ma sundatang dino oi doho dino. Nokokuro tu tinakau dikou” ka dino sonit. ”Kada pomudut sino ka sino Odonit, iti sundatang diti di ahat o sanganu diti” ka dinot tidi do kara.

Na sisiri nod puun monggis ka inot Sonit dot banal ko olungui om upus banal ginavo dau dinot Sundatang dau. Kagi po minitalib ka inot Tongkuzu om nimot no dau dot banal ko olungui om osusa banal ka ginavo dino Sonit. Osianan ka bogima inot Tongkuzu, ”Nokokuro ko ka dinot Odonit tu banal ko olungui om osusaan ko banal ginavo?” ka dinot Tongkuzu. ”Isakah amu olungui oku ong silod savat ilo Sundatang ku tu tinakau no dilot ongo kara” ka dinot Sonit. ”O.. yadkino bala bino” kadi Tongkuzu. ”Kada kosusa botoh ginavo, tulungan kikau manganu dinot Sundatang nu” ka dinot Tongkuzu.

Na minindakod no ka it tongkuzu dinokah dot odoromoi ot gama. It tanak do kara kino magavi no banal monundatang, ka dit tuni dau "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka. Na momosomok poh kah it tongkuzu nopurasaan no dinot anak do kara ka om pongoduat no sid tidi dau. "Idi, nunu kino muyumang-kuyumang dino" kad dinot anak do kara. Ambato no ka dinot tidi do kara dino dot amu no siniratan dau "Adih Gung-guung d’yonggison bino ahat" ko dinot tidi do kara. Na noronggou po ka vagu dinot anak do kara amo yadkino pangambat dit tidi dau, minonundatang no vagu kah yadara. "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka dit tuni sundatang. Na nimot po kah dinot anak kara om osomok no banal ino tongkuzu kah, minongoduat no vagukah sid idi dau. "Idi, nunu kino muyumang-kuyumang dino" kad dinot anak do kara. Ambato no ka dinot tidi do kara dino dot amu ih siniratan dau vagu ka "Adih Gung-gung D'yonggison kangku bino ahat" ka dinot tidi do kara. Na noronggou po ka vagu dinot anak do kara amo yadkino pangambat dit tidi dau, minonundatang no vagu kah. "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka dit tuni sundatang. Suvot po kah dinokah, nokorikot poh ino tongkuzu ka om onggipai no dau ino tontoluw d'yadara ka om "Kisak, kisak..." ka dinot tanak do kara om "Pobo!!" ka sid puun do monggis ka tu naratu no yosido. Antad noko nababak ka ino tulu tanak dinot kara. Na it Sonit ka dino rumikot no sinod anak do kara naratu tu manganu no dit sundatang dau. Irit tongkuzu nopo kah nonggipan po daukah antad noko minurus mindahu sid puun do monggis. Monorima kasih oku sid dikau Ambaza tu tinulungan oku dikau ka dit Sonit. Miabal ih bino ka dit Tongkuzu. Na it kara ka soira nimot dot minatai it tanak daukah inihim no dau Yodonit om ie Tongkuzu topot suvot poh kah alaid no mininsava tu minozo no dit murulun. Antad dit tadau diri kah it Sonit om it Tongkuzu banal ko mikoruhang topot ong it Kara kah banal ko mipatai tantu ong kopisamung.

IT TANAKVAGU OM IT ENUVUNG DO POTIZUKAN

Iti no tuturan do kodori soira sumusul dit koposizan momogun dih gulu. Na siti varo iso tanakvagu kah banalko ozi banal dot manapu do potizukan. Okuro ong opu-opu o puun monggis do potizukan om banal ko asavat kah nga indokodon ih kah dau. Insan tadau minamapak no ka inot tanakvagukah dit osopungi dinot puun monggis topot okuro ong minsosodopi kah kakal amu korikot dit raan gininiton dit ongo potizukan. Nah inintaranan no boh dit tanakvagu mamapak kah tu minsosodop no banal. Sondiu no ka yosido om pomurikit no do tapui. Na hiza po kah dit orondom no, ti vondoi no dot bulavan o binatang kah gamko yosido dinokah sirid sunsud ogi yosido. Soira yadkino ka banal ko ovongo inot tanakvagu kah tu it kinorikatan dau sino nga baiko govuton om mad nopo nga bulavan ogi o binatang. “Adih ka dit ginavo dit anakvagu, valai dati do rogon iti” kah dau. Na nokitung no it tanakvagu dot mogidu anatad sino topot nokitung ih yosido dot ong okon ko rogon isai ma mintoron.

Ingkakat no ka yosido sid puun do tukad om poinggogongou no ka yosido. “O Amai, Kindakod oku” ka dau nga aso ih mumbongut. “O Inai..Kindakod oku” ka dit Tanakvagu nga aso ih mamabat. Pongodim po kah vagu yosido “O Adi, Kindakod oku” ka dau. Na norongou no ka dau dot “O indakod no ka”. Indakod no ka inot tanakvagu kah om nimot no ka dau dot ogumu ogi tulun mintoron sinod binatang kah. Na it minangambat dau dino kah banal ko avasi ka inot Enuvung gamko inahak po kah diri yosido dinot Enuvung pogom. Sokoviai it ongo ulun sinokah banal ko monginin dit nunu nopo it ih suhuu dit enuvung ka dino. Na minomoros no ka it enuvung sid tanakvagu dino “Nakakan ko no ka dino Adi” ka dit enuvung siriyad tanakvagu. “Amu po” ka dit tanakvagu. “Ong yadkino pakanon po dahai ikau” ka dit enuvung ponuhu no yosido dit ongo ulun vokon sino. Surungai no ka yosido dot tongo akanon topot it ongo akanon noko surung sino dino kah it kana om pinoko ginazau sid kazakap dino anak om tontolu do potizukan. Om iri nopo vaig kah antad do pahaa do potizukan. Na minongoduat no ka inot enuvung “ nunu kah ong iti diti?” ka dit enuvung. Na ambato nopo kah dit tanakvagu ”amu ilaan ku nunu ino” ka dot baiko minomudut yosido. ”Om iti, nunu iti?” ka vagu no dit Enuvung dot piokiit dau it paha do potizukan. Na minomudut no vagu ka it tanakvagu ka dau ”ino nga amu ih ilaan ku” ka. ”Banal bo amu ilaan nu?” ka dit enuvung. ”Banal” ka dit Tanakvagu. ”Na ong yadkino akaan no bo toh” ka dit enuvung. ”Amu akanon ku ong iti tu amu kopimot oku” ka dit tanakvagu. Na soira do noboros dit tanakvagukah om amu mangakan oku ka, sinurungan nobo dit enuvung banal ko avasi dino kah dot ginazau, kana do sada om vaig na minakan no bo ino tanakvagu dino kah nopongo poh kah monginakan kah it tanakvagu, minomoros no it enuvung ka dau ”ikau diti okon ko mad ko riniba vokon manjadi polobuson no dahai ikau” ka dit enuvung do potizukan. ”Yadkiti okoi ma diti tu kogumui dit ongo ranzat za avi dit ongo riniba mangakan om minghuzas dit ongo valai za. Na inot tu amu ngoviai yadkino riniba na amu nobo murokuro okoi dikau” ka dinot enuvung do potizukan. Anuvo no ka dau it kazakap do minit-ginit om iri yat tumpung om izanai no dau do anak om paha do potizukan. ”Onuvo no iti topot soira dot anavau dit minsusuvab minsodu ko no antad siti” ka dit enuvung. ”Oboh, yadkino no bo dino” ka dit tanakvagu.

Na hiza po dit minsusuvab om amu po anavau kah poringpihot no ka inot tanakvagu om pamanau muli minsodu dinot bulavan binatang do potizukan. Topot poh kah anavau po notimpan no dit tanakvagu antad sid sodu tihuzas no ka inot ongo binatang om nulit om kumuro kah tinizonon dit potizukan. Na minamanau no ka muli it tanakvagu. Soira nokuli sid pomogunan dau ka, binahagi-hagi no ka ino nongoi dau. Om tinoturan no ka dau o nunu navazaan dau soira ihiza minamapak sampai ih kinosomungan dau dinoyat enuvung do potizukan. Na norongou kagi dih Ongkol-ongkol. ”Adih, Ambaza amu ilo ko mangambat ongo ikau” ka di Ongkol-ongkol. Imatai ka pogi ong yoku sumori ogumu adapatku paha om anak potizukan tu ilo mangambat ong yoku” ka di Ongkol-ongkol.

Osopung poh ka Yongkol-ongkol minamanau no ka. Nimot po ka dau dot iso o puun monggis om papakai no ka dau. Mad no ka it tanakvagu, soira amu navi dau mamapak na miniringodop sirid puun monggis. Suvot po ka dinot, orondom po ka povovondoi dot bulavan o binatang. Na yongkol-ongkol dino kah soira mongodim mokiindakod na kinodim dau it enuvung potizukan ka dau “O Adi kindakod oku” ka dau. Na inambat po ka diri bo gima dit Enuvung. Na nahak po kah dit enuvung pogom, sinurungan no bo dau do Paha om anak do potizukan om dinuat no dit enuvung yi ongkol-ongkol nunu ino. Na yi Ongkol-ongkol tu banalko mokimamaha inambat nobo dau dot ka dau “Adih Paha om Anak Potizukan ino” ka dau om amu po noboros di enuvung paakan kah minakan nobo yi ongkol-ongkol. Suvai rual om hungot ginavo dinot enuvung potizukan kah mimot-imot dinot kobuatano dih ongkol-ongkol ka om iduanai no ka dau yi ongkol-ongkol. Na yongkol-ongkol diti tu banalko mokimamaa, amu milod ikum om araat o ginavo kah avangaan ka tu okonko tinahakan yosido do paha om anak do potizukan ka gamko iniduanan ogi yosido. Minanavahan no ka yi ongkol-ongkol, ”Tahakai oku po kah dit paha om anak potizukan dikou Adi” ka dau. Ka dit Enuvung Potizukan “Uli no amu kuokuozon za ikau ka” dit enuvung potizukan. Topot yi ongkol-ongkol tu banal ko araat ka minimoros no yosido ka dau “Oboh, ong amu tahakan oku dikou tutudan ku iti valai dikou” ka di ongkol-ongkol. Norongou po kah dit enuvung potizukan ka om yadkino boros di ongkol-ongkol pomoros no ka yosido “Ikau no riniba banal ko araat. Ino tu yadkino boros nu na intahan no” ka dit enuvung potizukan.

Na it sid pomogunan di ongkol-ongkol ka, song binatang humongkob ka tu amu po nokuli-uli yongkol-ongkol. “Na ong yadkino ihimo botoh ditokou” ka dit tanakvagu. Ihimo no ka dioti yongkol-ongkol ka. Soira nokorikot sid puun monggis, suvai nokotigog ngoviai it ongoulun mogihim di ongkol-ongkol ka tu sid savat raan do monggis yongkol-ongkol do mamparampai no. Na ponguvun no ka do tapui inot ongo ulun dit nokorikot sino ka om indokodo no dit tanakvagu ka tu mongoi no ka bogima di buntung di ongkol-ongkol sid raan do monggis. Nokindahu po ka, nimot noko inot inan di ongkol-ongkol dot noponuan do singot do potizukan. Lopoto no ka dit tanakvagu inot buntung di ongkol-ongkol do lambagan do kazu om kakato no ka bogima dioti om nokorikot po sid binatang polobongo no ka dioti tu minatai no yongkol-ongkol.